Kryeministri Edi Rama e ka nisur me replika fjalën e tij në Kuvend, me deputetët e opozitës, që sipas tij nuk kanë të drejtë që të flasin në emër të shqiptarëve, pasi humbën keq zgjedhjet e 14 Majit.
Rama tha se për rritjen e pagave, që do të bëhet tashmë realitet, socialistët kanë punuar gjatë gjithë këtyre viteve në qeveri, ndërsa ambicia e fundit të këtij mandati është paga mesatare 900 euro.
“Në emër të shqiptarëve flasin shqiptarët dhe ata të cilët shqiptarët i mandatojnë për të folur. Por kur shqiptarët sapo kanë folur dhe kanë folur aq qartë sa natyrisht kanë tronditur një pjesë të atyre që janë ata që nuk duan të dëgjojnë, është shumë komike që të flitet në emër të shqiptarëve. Flitet në emër të shqiptarëve që braktisën politikën, zgjedhjet apo në emër të të rinjve që ishin të pakët në votime. Sa i takon pjesës që unë përfaqësoj, shqiptarët jo vetëm që nuk na kanë braktisur por na kanë mbështetur më shumë se kurrë më parë. Kështu që arsyet e braktisjes kërkojini te mënyra se si e shihni Shqipërinë dhe si flisni me shqiptarët”, tha Rama.
