Një nga aleatët e PD-së, Fatmir Mediu nuk do të jetë në protestën e 6 dhjetorit të thirrur nga Sali Berisha pikërisht në ditën kur në Tiranë do të zhvillohet Samiti i BE-së ku në kryeqytetin shqiptar do të zbarkojnë liderët e gjithë Europës.
Gjatë një interviste për “Euronews Albania”, Mediu mendon se kjo protestë nuk duhet të zhvillohet pasi mund të krijojë perceprime të gabuara kundër Bashkimit Europian.
“Unë padyshim e vlerësoj që protesta është një nga elementët më të domosdoshëm politikë. Por për protestën e 6 dhjetorit as nuk më ka pyetur kush, as më ka kërkuar njeri mendim. Por ajo që dua të them, është që protesta nuk duhet kthyer në qëllim vetvete të opozitës. Meqenëse ndodhemi para një Samiti të rëndësishëm, është e rëndësishme ajo marrëdhënie që ka Partia Demokratike apo Republikane, dhe parti të tjera të opozitës, që ne, në momente të tilla duhet të kemi një qëndrim të përbashkët me partnerët tanë, me Partitë Popullore Europiane, me Partitë Konservatore Europiane, edhe me ata njerëz apo qendra vendimarrëse europiane, në mënyrë që mos të krijojmë perceptime të gabuara të cilat mund të kthehen në disavantazh opozitar”, tha Mediu.
