Deputeti i PD-së Asllan Dogjani ka bërë një propozim qesharak duke deklaruar që Edi Rama duhet të shpallet “Non Grata” duke mos i lejohet hyrja në Kosovë.
Referuar gabimit të gazetarit të “Financial Times” i cili keqinterpretoi deklaratën e Ramës, Dogjani tha se kjo ka vulosur qëndrimin e kryeministrit shqiptar në lidhje me Kosovën dhe i kërkoi Albin Kurtit shpalljen ‘non grata’ dhe Ramës t’i ndalohet hyrja në Kosovë.
“Deklaratat që bën kryeministri kudo që shkon e kanë dëmtuar Kosovën. Por deklarata a djeshme që veriu i Kosovës nuk është tokë e askujt vulos njëherë mirë qëndrimin e Edi Ramës ndaj Kosovës. Dua t’i them që veriu i Kosovës është tok shqiptare, për atë tokë janë vrarë 1500 fëmijë. Duhet të dënojmë sulmin që bënë terroristët serbë në veri të Kosovës ku u vra polici Afrim Bunjaku me qëllim aneksimin e veriut të Kosovës. Ky njeri ose nuk e do Kosovës ose është i kapur nga Vuçiç. Ndaj ose duhet ta ndalojmë të flasë për Kosovën ose kryeministri i Kosovës ta shpallë non grata, ta ndalojë të hyjë në Kosovë.” – tha Dogjani.
