Pas vendimit të Apelit që i dha “vulën” Sali Berishës, një tjetër deputet është larguar nga Grupi Parlamentar i Partisë Demokratike.
Deputeti Arbi Agalliu njofton largimin nga grupi i PD-së ndërsa shpjegon arsyet se përse e mori këtë vendim. Agalliu shkruan se Berisha nuk përfaqëson bindjet e tij, ndërsa thekson se ka ardhur koha për një opozitë larg hijes së korrupsionit.
“Klasa e politikës së vjetër që ka mbajtur peng këtë vend do duhet të largohet. Vendimi i fundit i Gjykatës së Apelit fatkeqësisht vendosi që partia më e madhe opozitare t’i kalojë Sali Berishës, i cili përfaqëson një politikë që nuk përkon me bindjet e mia, përveç problemeve që ka me drejtësinë apo me vendet simbol të demokracisë. Nisur nga qëndrimet e mia të deritanishme dhe asaj që besoj, shpreh sot largimin nga Grupi Parlamentar i PD. Demokrat nuk të bën as vula e as logo por qëndrimet dhe parimet, bindjet dhe besimi”, shkruan nder te tjera Agalliu.
