Enio Civici, zëvendës ministri i Bujqësisë, befasisht ditën e djeshme u shkarkua nga detyra.
“Newsbomb.al” mëson se në fakt ka pasur një përplasje të tij me titullaren Anila Denaj, që ka bërë që kjo e fundit të dërgonte emrin e tij për shkarkim nga detyra. Si zëvendësministër, Enio Civicit i është kërkuar që të përgatiste një raport për punën e Ministrisë së Bujqësisë dhe drejtimin nga Anila Denaj, i cili do të duhet të prezantohet më datë 1 Shtator para kryeministrit Edi Rama.
Më datë 1 Shtator Edi Rama ka thirrur anëtarët e kabinetit në një takim informal, për t’u njohur me bilancin e punës së tyre, arritjet dhe çfarë problematikash mund të kenë hasur ministrat gjatë ushtrimit të detyrës.
Mirëpo, zëvendësministri Enio Civici ndodhet aktualisht me pushime dhe nuk ka pranuar që të kthehet në Tiranë, për të përgatitur materialet dhe raportin që i ka kërkuar drejtuesja, ministrja Anila Denaj. Mes të dyve ka pasur një debat në distancë dhe në këto kushte, ministrja e Bujqësisë ka kërkuar shkarkimin e tij nga detyra.
