Ndërkohë që data 12 Mars po afron me shpejtësi, (Afati i fundit për dorëzimin e emrave të kandidatëve në KQZ), brenda Partisë Demokratike duket se ka turbullira të shumta.
Koalicioni që shpalli Berisha, Aleanca për Shqipërinë Madhështore me 26 parti, ka në dispozicion vetëm 42 emra për vende të mbyllura.
Pikërisht për këtë pjesë të “tortës” po bëhet e gjithë “lufta” ku PL e Ilir Metës ka siguruar 4 emra në Listën e Mbyllur. Vetë Meta i cili gjendet në burg, Tedi Blushi, Erisa Xhixho dhe Edmond Haxhinasto. Gjithashtu edhe Përparim Spahiu ish-deputet i LSI, mund të futet në Listën e Mbyllur të Dibrës nga ana e PD, ndaj edhe konkuroi në Primare.
Por pikërisht për kandidatët e sigurt të PL, duket se do ketë surpriza. “Alfapress.al” ka mësuar se Sali Berisha pas negociatash të shumta e ka bindur Ilir Metën që të spostohet nga Lista e Mbyllur e Tiranës, te ajo e Fierit. Në Tiranë do të jetë Tedi Blushi, në Elbasan Edmond Haxhinasto, kurse për Erisa Xhixhon nuk është përcaktuar ende Qarku.
Edhe pse me negociata të vështira, spostimi i Ilir Metës prej Berishës nga Tirana në Fier, duket se ka të bëjë me kalkulimet e emrave në gjithë vendin dhe hesapet qark më qark./ Alfapres.al
