Një nga mbështetëset e Berishës gjatë procesit të Rithemelimit, Mimoza Rexhvelaj, ka reaguar ashpër ndaj mënyrës se si u manipulua procesi i primareve brenda Partisë Demokratike.
Në një postim të saj në rrjetet sociale, Mimoza shprehet se shifrat e votave janë fryrë në mënyrë qesharake dhe në fund, lista përfundimtare nuk përfaqëson fituesit realë të garës, por individë që nuk kanë marrë mbështetjen e demokratëve.
Ajo vë në dukje rastin e Aurel Markajt, ish-kryetar i komisionit të primareve në Malësinë e Madhe, i cili, pa garuar, përfundoi në listën për deputetë të Shkodrës.
Rexhvelaj e mbyll reagimin e saj duke ironizuar situatën, duke e quajtur procesin e primareve një farsë të kthyer në barcaletë.
“Shkëlqimi dhe shëmbja e Procesit të Primareve! Procesi u deformua, shifrat u frynë sa u bëmë qesharak për publikun e gjërë. Ajo që bije në sy është mosrreshtimi i njerëzve që fituan primaret dhe rreshtimi i atyre që kanë 20 vota, ose më pak. Qeshia mbi tortën e primareve është lajmi i fundit ku rezulton kandidat në listën e Shkodrës Aurel Markaj kryetari i komisionit të primareve në Malësinë e Madhe. Nuk kam asgjë personale me Aurelin, por mëqënse ka pas ëndërr dhe aspirata për Deputet pse nuk garoj si ne? Pse nuk ndoqi procedurën e rregullt të kandidatëve të tjerë? Pse bëri kryetarin e komisionit në Primare dhe sot ai rezulton në listë? Keto 48 orët e fundit jemi bërë barcaletë në Malësi. Mos është ky shpërblimi për mbushjen e kutisë në Malësi apo thjesht rastësi?!“, shkruan nder te tjera Mimoza Rexhvelaj.
