Qëndrimi i Adriana Kalasë ndaj Jorida Tabakut mesa duket nuk ka për të ndryshuar, edhe pse Sali Berisha vlerësoi punën e bërë në fushatë nga deputetja demokrate.
Berisha u shpreh se Kalaja nuk ka asnjë provë apo fakt për të provuar akuzat e saj se deputetes Tabaku “ia bleu votat Edi Rama”, me qëllim që të poshtëronte sipas saj kundërshtarin e tij politik.
Pas “mbrojtjes” që Berisha i bëri publikisht Tabakut, i menjëhershëm ka qenë reagimi i Adriana Kalasë e cila ka lënë komentin e saj duke insistuar në pretendimin e saj. Madje sipas Kalasë, do vijë dita kur vetë Berisha do t’i japë të drejtë dhe do t’i kërkojë falje.
“Je shumë gabim. Partia jonë prandaj quhet demokratike. Do vi dita kur dr.Berisha të më japë të drejtë. Plus që kanë gjithë këto ditë ata që më kundërshtonin prej dy vitesh si për Kodin Zgjedhor, si për votën e diasporës, më kanë kërkuar falje. Gjithsesi, mbaje këtë status se do i rikthehemi shumë shpejt”, shkruan Kalaja.
