Biznesmeni kosovar Behgjet Pacolli ka reaguar për zhvillimet e fundit lidhur me projektin e Aeroportit të Vlorës, duke hedhur poshtë çdo spekulim që lidhet me ndonjë çështje ligjore apo pengesë në ndërtim.
Pacolli publikoi foto të reja nga kantieri i punimeve dhe theksoi se aeroporti po përfundon brenda afateve.
“Aeroporti i Vlorës (investimi më i madh privat në infrastrukturë publike) po përfundon brenda afatit kontraktual dhe po merr formën e një prej aeroporteve më moderne, më funksionale dhe më të bukura në gjithë rajonin. Falë edhe vizionit dhe kontributit personal të Kryeministrit Rama, veçanërisht në drejtim të zgjidhjeve estetike dhe dizajnit të brendshëm, kjo vepër po shndërrohet në një ‘boutique aeroport’ – unik në llojin e vet dhe krenari kombëtare”, shkruan Pacolli.
Pas këtij postimi, Pacolli komentoi edhe në pyetjet e ndjekësve të vet, të cilët kërkonin informacion në lidhje me pezullimin e punimeve nga Gjykata e Tiranës.
“Ditët e fundit po qarkullojnë artikuj të sponsorizuar, thashetheme e teori konspirative nga individë të cilëve u kam ndërprerë ‘ushqimin’ për shkak të abuzimeve evidente që kanë kryer. Besoj fort se drejtësia do të veprojë në mënyrë të paanshme dhe ligjore, duke bërë detyrën e saj ashtu siç duhet”, shkruan Pacolli.
Ky reagim shihet si përgjigje e drejtpërdrejtë ndaj raportimeve për një përfshirje në një çështje gjyqësore në Gjykatën e Tiranës, të cilat ai i cilëson si “të fabrikuara nga interesa personale”.
