Ambasada e Shteteve të Bashkuara të Amerikës në vendin tonë ka dalë me një njoftim të rëndësishëm mbrëmjen e kësaj të diele, ku dhe u ka bërë thirrje të gjithë shtetasve amerikanë që të tregojnë kujdes.
Ambasada ka rishpërndarë thirrjen e Departamentit Amerikan të Shtetit, të cilët u kanë bërë apel amerikanëve në mbarë botën, që të ndjekin me vëmendje udhëzimet e sigurisë, në një kohë kur lufta në Lindjen e Mesme po përshkallëzohet dhe Irani është zotuar për hakmarrje.
“Amerikanët jashtë vendit duhet të ndjekin udhëzimet në njoftimet e sigurisë të lëshuara nga ambasada ose konsullata më e afërt e Shteteve të Bashkuara”, thuhet në njoftimin e bërë nga ambasada, ku më tej kanë paralajmëruar dhe për mbyllje periodike të hapësirës ajrore duke sjellë kështu dhe ndërprerje të udhëtimeve.
Për më tepër, ambasada thekson se objektet diplomatike amerikane, përfshirë ato jashtë Lindjes së Mesme, janë vendosur në shënjestër nga Irani.
