Ashtu sikurse dhe pritej e paralajmëruar më herët, protesta e një dite më parë jashtë ambienteve të Kuvendit të Shqipërisë u shoqërua me tensione dhe përplasje mes efektivëve të Policisë dhe protestuesve.
Burime për mediat bëjnë me dije së fundmi se si pasojë e protestave të një dite më parë vetëm një prej protestuesve është mbajtur në qelitë e paraburgimit. Ai është shtetasi Mustafa Veizi i cili dyshohet se ka qëlluar me vezë automjetin e deputetes socialiste, Ilva Gjuzi.
Pas përfundimit të seancës plenare e cila zgjati 60 minuta, protestuesit u përfshirë në episode dhune dhe tensionet me Policinë e Shtetit e cila ishte duke siguruar daljen në mënyrë të sigurt të deputetëve nga seanca.
Dhjetëra protestues ishin mbledhur rreth e qark Parlamentit që para nisjes së seancës plenare, dhe ashtu sikurse e herët e tjera, ata qëlluan deputetët me vezë. Disa prej automjeteve të ligjvënësve u bënë shënjestër e vezëve, ndërkohë që deputetja Gjuzi u detyrua që të ndalojë pasi automjeti i saj u rrethua nga protestuesit.
Mesa duket një prej protestuesve që qëlloi deputeten Gjuzi me vezë dhe domate ka qenë dhe Mustafa Veizi i cili pritet të dalë në ditët në vijim para Gjykatës për masën e sigurisë./ NewsBomb
