Kryeministri Edi Rama mbërriti ditën e djeshme në SHBA, në kuadër të javës së Kombeve të Bashkuara.
Teksa ashtu siç lajmëroi edhe vetë, ai e nisi këtë vizitë me një takim me komunitetin shqiptar në Michigan, për të cilët dha edhe një lajm të mirë: hapjen e konsullatës shqiptare në Michigan.
“Ministria për Evropën dhe Punët e Jashtme së shpejti do të hapë konsullatën shqiptare dhe besoj që është vendimi i duhur dhe i merituar”, u shpreh Rama.
Kryeministri e nisi fjalën e tij duke sjellë në vëmendje një fakt simbolik nga Michigani, ku sipas tij disa vite më parë ishte regjistruar për herë të parë një flamingo si vizitor, duke e lidhur këtë edhe me simbolin që kanë marrë flamingot në shqipëri këto muajt e fundit, për shkak të protestave.
Sipas tij, shqiptarët nuk jetojnë më me logjikën e vjetër se “ka dhe më keq”, por gjithnjë e më shumë kërkojnë që gjërat të bëhen më mirë.
Më tej ai u shpreh se marrëdhënia mes emigantit shqiptar dhe vendit ka ndryshuar, sipas tij për shkak të transformimit ekonomik të Shqipërisë.
“Tani ju në Shqipëri nuk dërgoni më para për bukë apo për ilaçe, për mbijetesë. 90 për qind e familjeve kanë përfituar këto 35 vjet së paku një herë nga diaspora shqiptare. Tani ne nuk jemi një vend mbijetese, por një vend shprese”, u shpreh Rama.
Rama shtoi ndër të tjera se diaspora nuk duhet të shihet thjesht si një burim remitancash. Teksa përmendi edhe votën e diasporës në zgjedhjet e fundit dhe tha se tashmë po ndërtohet një strategji më e gjerë në kuadër të “Shqipërisë 2030”, me diasporën në qendër të saj.
“Diaspora nuk është një llogari bankare e atdheut, por është një rrjet i madh njerëzish që mbajnë sytë nga atdheu. Tani kemi një strategji më të gjerë të Shqipërisë 2030, e cila e ka në qendër të vëmendjes diasporën. Ne po krijojmë Regjistrin Kombëtar të Diasporës, që do të jetë një dritare unike për t’u lidhur me Shqipërinë”, u shpreh ai
Më tej kreu i qeverisë, konsideroi si ambasadorët më të mirë të Shqipërisë, shqiptarët që jetojnë dhe punojnë përtej oqeanit. “Ambasadorët më të mirë të Shqipërisë këtu janë shqiptarët që i ngrenë emrin Shqipërisë. Sot vizitova një biznes shqiptar në SHBA, ku dola në fotografi së paku me 40 bjonde amerikane. Nuk besoj se ka gjë më domethënëse për Shqipërinë se kjo”, tha Rama.
Në vijim të fjalës së tij, Rama u ndal edhe te vendimi i Gjykatës Speciale në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
“Shqipëria s’mund të bëjë asgjë më shumë sesa t’i rrijë në krah Kosovës, por ata duhet të vendosin të bëjmë gjithçka për ta zhbërë atë vendim kundër atyre katër burrave”, tha ai.
Gjithashtu në afërsi të hotelit ku u zhvillua takimi, një grup personash organizuan edhe një protestë në distancë. Mes pankartave dhe thirrjeve përmendeshin “Rama në burg” dhe “Berisha në burg”. Takimi pati edhe një moment simbolik në fund, kur fëmijët e shkollës shqipe në Michigan i dhuruan kryeministrit një punim të përgatitur për të, ku shrkuhen “Kryeministrit të Republikës së Shqipërisë, z. Edi Rama”, i rrethuar nga emrat dhe firmat e fëmijëve.
