Bordi i Transparencës ka përcaktuar çmimet e reja të shitjes me pakicë dhe shumicë të naftës dhe benzinës në Shqipëri.
Në mbledhjen e zhvilluar këtë të martë, Bordi vendosi që çmimi i shitjes me pakicë i gazoilit (naftës) të jetë jo më shumë se 219 lekë për litër, ndërsa çmimi i shitjes me shumicë të mos kalojë 207 lekë për litër.
Për benzinën, çmimi maksimal i shitjes me pakicë është përcaktuar në 196 lekë për litër, ndërsa ai i shitjes me shumicë do të jetë jo më shumë se 184 lekë për litër.
Çmimet e reja do të hyjnë në fuqi sot, më 13 tetor, në orën 14:00, dhe do të mbeten të vlefshme deri në mbledhjen e ardhshme të Bordit, ku do të shqyrtohen sërish në varësi të ndryshimeve të çmimeve në treg.
