Kryetari i Bashkisë Tiranë, Erion Veliaj, i ka drejtuar një kërkesë antarëve të Këshillit Bashkiak të Tiranës ku ka kërkuar të jetë i pranishëm dhe të dëgjohet në në mbledhjen e ardhshme të Këshillit Bashkiak, në të cilin pritet të bëhet shkarkimi i tij nga detyra.
Në kërkesën e tij, Veliaj është shprehur se mungesa e tij nuk është pasojë e vullnetit të tij, por rrjedhojë e një mase sigurie disproporcionale, dhe thotë se do ta kundërshtojë deri në Gjykatën Evropiane të të Drejtave të Njeriut.
Veliaj ka thënë gjithashtu në kërkesën e tij se, masa e marrë ndaj tij ka paralizuar qeverisjen e kryeqytetit.
“Mungesa e imponuar nga një masë paraprake, jo nga një vendim përfundimtar fajësie, nuk është as mungesë e vullnetshme, as shkelje e rëndë kushtetuese, por cenim i hapur i parimit të përfaqësimit demokratik dhe një precedent i rrezikshëm për qeverisjen vendore”, është shprehur ai ndër të tjera.
