Kryetarja e Gjykatës Kushtetuese, Holta Zaçaj tha se nuk kishte informacion në lidhje me disa pretendime se gjyqtarët e këtij institucioni janë në përgjim nga ana e SPAK-ut.
Eksperti i kriminalistikës, Ervin Karamuço tha se kryerja e përgjimit nuk mund të cilësohet si “puç” kushtetuese, por thjesht një praktikë e bazuar në ligj, nëse ka një kallëzim në SPAK nga ndonjëri prej anëtarëve të Gjykatës Kushtetuese për ndikime të paligjshme.
“Nuk jemi para një puci kushtetues. Puci kushtetues, do ishte që pa asnjë lloj indicie, pa asnjë lloj informacioni të shkojë në GJK dhe t’i mbajë të gjitha në përgjim, si policitë sekrete të dikurshme. Por nëse ti i ke letrat aty të një kallëzimi, ke ndërmarrë të gjitha veprimet me gjykatë për të zhvilluar veprime hetimore, çdo gjë është në përputhje me ligjin. Por ku do shkojë kjo? A do kemi një masë për anëtarin e një gjykate, apo do pushohet sepse nuk ka prova nga ata që janë kallëzuar nga ana e këtij anëtari, nëse është anëtar gjithsesi”, tha Karamuço.
