Deputeti i PS-së, Petro Koçi deklaroi se protesta e opozitës sundohet nga interesat personale të Sali Berishës. Koçi shprehet se fundi i protestës na bëri të ditur se organizatorët kanë frikë nga shteti ligjor.
“Protesta dhe turmëzimi demostroi se opozita sundohet nga interesat personale të Sali Berishes dhe se shanset që kjo opozitë të transformohet e modernizohet janë thuajse zero. Fundi i protestës na bëri të ditur se tashmë organizatoret e kanë frikë shtetin ligjor dhe penalitetet ndaj atyre që shkelin ligjin dhe rendin publik”, tha fillimisht Koçi.
Koçi e konsideron lëvizjen e opozitës paralel me lëvizjet politike të Serbisë. Ai thekson se kjo opozitë nuk prodhon shpresë por nxit urrjetje politike ndaj kundërshtarëve.
“Kjo lëvizje e opozitës zhvillohet paralel me lëvizjen politike të serbëve të Kosovës. Fjalori politik i opozitës që përmblidhet nga kriminaliteti historik i PD dhe korrupsioni historik i LSI është me i varfër se ai i vitit ’90. Kjo opozitë nuk ofron shpresë. E shumta që tenton është vetëm nxitja e urrejtjes politike ndaj kundërshtarëve”, shprehet Koçi.
