Edi Rama është i “përjashtuari” i tryezës që do të shtrojë Kyriakos Mitsotakis në pallatin kryeministror grek këtë të hënë, në orën 20:15.
“Akujt e ftohtë” që janë ngritur nga 12 maji, kur Beleri u vu në pranga, në raportin Rama-Mitsotakis po dalin në pah me rastin e darkës informale për 20-vjetorin e Samitit BE-Ballkani Perëndimor dhe “Deklaratës së Selanikut”.
Lidhur me incidentin në nivel diplomatik, ka folur për mediat greke zëdhënësi i qeverisë helene, Pavlos Marinakis i cili ka thënë se ftesa e munguar për Ramën vjen si pasojë e qëndrimeve për çështjen e kryebashkiakut të Himarës, Fredi Belerit që ndodhet në burg i akuzuar nga SPAK për blerje votash.
“Qeveria greke me një sërë ndërhyrjesh të kryeministrit dhe ministrit të Jashtëm, është e koordinuar me shtetin e së drejtës, jo vetëm pranë Fredi Belerit një kryetar bashkie i zgjedhur ligjërisht, i cili duhet të betohet. Shqipëria duhet të respektojë rregullat bazë të shtetit ligjor dhe ne nuk do të bëjmë asnjë hap pas për këtë”, ka thënë ai.
