Pas videos virale të turistëve italianë që ikin pa paguar darkën në restorantin në Berat, këtë herë dy turistë po italianë, kanë bërë një gjest për t’u vlerësuar në Lushnjë.
Shqetësimi i një shqiptari që kishte humbur portofolin ka zgjatur pak! Dy turistët italianë, duke udhëtuar me biçikletë kanë gjetur në rrugë një portofol me një shumë parash dhe e kanë dorëzuar në komisariatin e policisë.
Burime mediatike thanë se brenda kuletës ishte një shumë prej rreth 500 mijë lekësh të vjetra. Policia thotë se pasi kanë kryer verifikimet në bazë të kartës ID që ishte në portofol, kanë njoftuar shtetasin që e kishte humbur, i cili është paraqitur në Komisariat për të marrë portofolin me shumën e konsiderueshme të parave, kartat bankare dhe kartën e identitetit.
Pasi ka marrë portofolin, ai ka falënderuar punonjësit e Policisë dhe dy turistët italianë, për gjestin e tyre.
