Ndryshimet e reja në Kodin Penal parashikojnë dënimin me më shumë vite burg për marrëdhëniet seksuale me të mitur, si dhe dënimin me burg për bigaminë (martesa me dy ose me shume gra).
Në propozimin e ndryshimeve rritet mosha për cilësimin si krim të marrëdhënieve me të mitur. Ndërsa Kodi aktual e cilësonte krim kryerjen e marrëdhënieve deri në 14 vjeç me ndryshimet e reja kjo moshë është deri në 16-vjeç.
Në Kod përcaktohet se “bashkëjetesa e një personi madhor me një të mitur të moshës 14 deri nën 16 vjeç, kur bëhet për qëllime të njëjta me ato të martesës apo marrëdhënies së ngjashme me të, dënohet me burgim nga 4 deri në 8 vjet”. Nëse bashkëjetesa kryhet me një të mitur të moshës 16 deri në 18 vjeç, dënohet me burgim nga 2 deri në 5 vjet.
Për veprat penale kundër martesës, sipas propozimeve në Kodin e Ri, thuhet se “lidhja e dy ose më shumë martesash në të njëjtën kohë dënohet me gjobë ose me burgim deri në 3vjet”. Nëse bigamia vazhdon pas dënimit të parë, dënohet me burgim nga 6 muaj deri në 4 vjet.
