Paraditen e së premtes (5 korrik) do të hapet Tuneli i Llogarasë, një vepër e rëndësishme infrastrukturore. Me një gjatësi prej 5.9 km, Tuneli i Llogarasë shkurton ndjeshëm kohën e udhëtimit drejt bregdetit të jugut.
Zëvendëskryeministrja, Belinda Balluku ndoqi nga afër përgatitjet e fundit që po bëhen para hapjes së tunelit, e cila rrit parametrat e sigurisë rrugore.
“Jemi në momentet e fundit të përfundimit të tunelit të Llogarasë. Parashikohet që pasnesër, në datë 5 korrik, ditë e premte, në orën 10:00, do të jetë momenti i hapjes së këtij tuneli. Sigurisht në kantier do të vazhdohet puna, pasi po dorëzohet para afatit, ashtu siç kemi bërë tashmë me të gjitha veprat tona të mëdha infrastrukturore, por tuneli i Llogarasë ka një vlerë tjetër edhe për historikun e infrastrukturës shqiptare. Tuneli i Llogarasë është një nga veprat infrastrukturore të kategorisë së rëndësishme përsa i përket tuneleve edhe në rang Europe. Futet në tunelet e gjatësisë së madhe”, tha Balluku.
