Sistemi i ri i hyrje-daljeve (Entry/Exit System – EES) i Bashkimit Evropian – i cili ishte parashikuar të hynte në fuqi nga 10 nëntori i këtij viti – është shtyrë për një kohë të papërcaktuar, për shkak se një pjesë e vendeve anëtare të bllokut nuk janë ende të gatshme për përdorimin e tij.
Lajmi u konfirmua nga Komisionarja e BE-së për Punë të Brendshme, Ylva Johanson e cila nuk tregoi se kur mund të hyjë në fuqi ligji i ri. Me sistemin “EES” të gjithë qytetarët nga vendet jo anëtare (përfshirë edhe Shqiptarët) që udhëtojnë për në BE, duhet t’i regjistrojnë në një sistem të veçantë digjital hyrjen dhe daljet e tyre nga territori i vendeve të BE-së. Në vendkalimet kufitare, udhëtarët duhet të lënë të dhënat personale, përfshirë edhe gjurmët e gishtërinjve dhe të dhënat e tjera të pasaportës biometrike.
Ky sistem është konsideruar si i nevojshëm për ta rritur sigurinë e Bashkimit Evropian, për të pasur një kontroll se kush hyn në BE, si edhe për t’i luftuar dhe sanksionuar keqpërdorimet nga ata që mund të hyjnë pa viza, por pastaj nuk i respektojnë rregullat. Komisioni Evropian dhe vendet anëtare të BE-së do të punojnë për të përgatitur zbatimin e këtij sistemi, por data se kur do të nisë kjo nuk është përmendur.
