Mbrëmjen e sotme në Pallatin e Kongreseve do të mbahet finalja e festivalit “Kënga Magjike”. Megjithatë, një lajm i papritur bëri bujë, pasi u aludua se Arilena Ara dhe Pirro Çako nuk do të performojnë në natën finale.
Sakaq, producenti dhe drejtuesi i festivalit, Ardit Gjebrea, ka sqaruar për tvklan.al arsyen e mungesës së tyre.
“E dëgjoni zërin tim? Edhe unë jam ftohur, por të paktën nuk do të këndoj. Për fat të keq, edhe Pirro është paqejf dhe për sa kohë që është në duet, më vjen keq që nuk do të jetë ky duet sonte në festival, por sëmundjes nuk ke ç’i bën”.
Kjo konfirmon se arsyeja e mungesës është tërësisht shëndetësore dhe duke qenë se kënga është duet, nuk do ketë performacë nga ata këtë mbrëmje. Arilena Ara dhe Pirro Çako ishin ndër konkurrentët më të përfolur dhe të pëlqyer të këtij edicioni me këngën e tyre, e cila ka fituar zemrat e publikut.
