Nga sot (1 shkurt) do të nisë aplikimi i çmimit të ulur të energjisë elektrike për konsumatorët familjarë.
Zëvendëskryeministrja, Belinda Balluku thotë se çmimi i energjisë elektrike është ulur në masën 10.5%, kurse tarfimi i ri do të pasqyrohet në faturën mujore të muajit shkurt, që paguhet në mars.
Enti Rregullator i Energjisë (ERE) miratoi më 8 janar të këtij viti uljen e çmimit të energjisë elektrike duke kaluar nga 9.5 lekë, në 8.5 lekë për kilovat-orë.
Janë mbi 1 milionë familje që që përfitojnë nga kjo lehtësi pasi konsumojnë deri në 700 kWh energji në muaj. Mbi këtë kufi, çmimi do të mbetet 9.5 lekë për kilovat-orë. Vendimi do të jetë në fuqi deri më 31 dhjetor 2025.
