Gjatë kësaj jave në territorin e vendit janë shënuar temperatura mjaft të ulëta, por situata do të ndryshojë duke filluar nga kjo fundjavë.
Sinoptikanja Lajda Porja bën të ditur se fundjava do të jetë pa reshje shiu, ndërsa temperaturat do të rriten sërish në fund të shkurtit duke arritur deri në 16 gradë Celsius në maksimalet e tyre.
“Kemi pasur një valë të ftohtë që ka regjistruar temperatura mjaft të ulëta, ku dita e djeshme në fakt ka qenë edhe dita më e ftohtë. Sot, kjo valë po largohet gradualisht. Sot kemi pasur në vlerat minimale rritje me të paktën 2 gradë, ku temperatura minimale mbetet -5 gradë në zonat e veri-lindjes, ku qytetet më të ftohta janë Bulqiza dhe Peshkopia. Temperatura tipike të Shkurtit. Parashikohet një fundjavë e qëndrueshme përsa i përket reshjeve, sidomos e shtuna që do të ketë më shumë diell. Parashikohet që e shtuna dhe e diela të shënojë temperatura minus 3 dhe minus 4 gradë do të jenë zonat malore që do të shënojnë temperaturat më të ulëta. Do të ngjitet termomentri deri në 16 gradë të shtunën dhe të dielën. Rriten temperaturat duke ju rikthyer javës së fundit të Shkurtit vlerave të tyre normale klimatike“, tha Porja.
