Deputeti i PD, Bledion Nallbati pranon se ka vepruar në gjaknxehtësi dhe pa maturi gjatë incidentit, ku së bashku me vëllanë, u konfliktua me një shofer kamioni.
Siç tregon Nallbati, ata kanë ulur shpejtësinë për shkak të një gropë në rrugë, ndërsa kamioni ishte pas me shpejtësi dhe mund të pësonim aksident.
“Ditën e djeshme rreth orës 21:00, ka ndodhur incident që më ka përfshirë mua, vëllain tim dhe një mjeti të tonazhit të rëndë. Pranoj me përgjegjësi të plotë që duhet të qëndroja me maturi, mbi këto lloj provokime, megjithatë jam njeri para se të jem politikan. S’është e vërtetë që unë apo vëllai i kemi prerë rrugën kamionit. Po udhëtonim nga Kapshtica në qytet, në rrethrrotullim është hapur një gropë që këta pushtetarë që keqinformojnë ngjarjen, nuk e riparojnë. Mjeti im uli shpejtësinë, ndërsa kamioni ishte mbrapa me shpejtësi dhe mund të pësonim aksident. Në këto kushte kemi ndaluar dhe ka dalë vëllai im që ishte shofer e pas tij unë. Kam tentuar shumë herë ta shmang këtë konflikt edhe pse isha në emocionet e asaj përplasje të mundshme të rrezikshme. Edhe shoferi padiskutim ka patur një reagim jo të duhur, duke më sharë mua e vëllanë tim. Emocioni prevalon ndonjëherë mbi arsyen, por jam njeri”, thote Nallbati.
