Muaji gusht do të mbyllet me temperatura të freskëta dhe reshje shiu.
Sipas meteorologes Lajda Porja, e shtuna do të ketë reshje shiu, të cilat do të sjellin edhe problematika me përmbytjet lokale.
“Gjatë natës të së premtes një sistem i fuqishëm vranësirash do të prekë territorin shqiptar, duke bërë që dita e shtunë të ketë reshje të dendura shiu. Do të jetë e gjithë ultësira perëndimore e rrezikuar: Qarku i Shkodrës, Tirana, Elbasani, Berati, Fieri dhe Vlora, do të kenë reshje në formë shtrëngatash. Parashikohet që e shtuna të ketë reshje gjatë gjithë ditës, rrebeshe, do të kemi vetëm momente të shkurtra ku do të ketë ndërprerje të tyre, megjithatë është e paqëndrueshme. Shirat do të jenë herë pas here problematikë duke sjellë përmbytje të rangut lokal në disa qytete të zonës së ulët ku është Durrësi, Vlora, Tirana, Elbasani, Lushnja dhe Fieri ku do të jetë intensiteti më i lartë dhe presim që të ketë edhe problem”, tha Lajda Porja.
Meteorologia bën me dije se temperaturat do të pësojnë ulje me rreth 10 gradë Celsius. Gjatë fundjavës problematike veç reshjeve do të jetë edhe era, sidomos në zonat bregdetare.
