“Shtëpia e Bardhë” ka reaguar pas momentit viral të kryeministrit Edi Rama lidhur me “talljen” ndaj presidentit të SHBA, Donald Trump.
Kontaktuar nga “Top News”, nëse batuta e Ramës ka ndikuar në marrëdhëniet dypalëshe mes Shqipërisë dhe SHBA-ve, apo nëse janë parë si negative, Zyra e Shtypit e Shtëpisë së Bardhë ka dhënë një përgjigje diplomatike.
“Presidenti Trump ka bërë më shumë për stabilitetin global, se sa çdo lider tjetër në botë!” thuhet në përgjigjen e kthyer.
E gjitha nisi pas një batute nga ana e tij lidhur me lapsusin e presidentit të SHBA-ve, Donald Trump, i cili teksa ka folur për paqen e arritur mes Azerbajxhanit dhe Armenisë, këtë të fundit e ka shqiptuar ‘Albania’, pra Shqipëri.
Rama me humor ‘kritikoi’ dhe presidentin e Francës, Emmanuel Macron që nuk i kishte uruar (Ramën dhe Aliyev) për paqen e arritur mes tyre. E gjitha kjo, në mediat ndërkombëtare u cilësua si një tallje e hapur me Donald Trump nga liderët evropianë e më gjerë.
