Projekti për hekurudhën Tiranë-Durrës dhe shtesa në Rinas pritet të ketë vijim të punimeve edhe gjatë vitit të ardhshëm, duke planifikuar që të ndërhyhet në stacionin e 11 i cili është lënë jashtë projektit aktual.
Kjo parashikon sjelljen e Stacionit në kryeqytet nga Terminali, që është stacioni final në variantin fillestar.
Referuar projekteve që do të financohen nga projektbuxheti i vitit të ardhshëm rezulton se qeveria ka parashikuar 400 milionë lekë apo 4.1 milionë euro për “Zbatimin e projektit të linjës hekurudhore terminali i transportit publik – stacioni i trenit Tiranë (4km), si zgjatim i linjës hekurudhore Durrës – Tiranë”.
Një tjetër projekt që do të financohet po me buxhetin e vitit të ardhshëm është blerja e njësive Elektrike (Emu) për Linjën Hekurudhore Durrës – Tiranë – Rinas me një fond 350 milionë lekë apo rreth 3.6 milionë euro. Tashmë qeveria ka hapur një tender lidhur me elektrifikimin e linjës në fjalë teksa gjithashtu parashikohet të dalë në tregje për të siguruar trenat e nevojshëm para vënies në funksion të hekurudhës.
Në disa deklarata të bërë nga përfaqësues të qeverisë dhe drejtues të Hekurudhës nisja e plotë e operimit do të mund të bëhet vetëm në fillim të vitit 2027. Ky projekt fillimisht u financua me një kredi rreth 70 milionë euro nga BERZH, ndërkohë që vetëm në fillim të këtij viti qeveria kërkoi një shtesë me 40 milionë euro të kësaj kredie për të mbyllur punimet e saj.
Sipas argumentit, shkak për këtë shtesë ishte bërë shtrenjtimi i materialeve të ndërtimit, që e kanë rritur dukshëm faturën ndërkohë që një pjesë e kësaj shtese do të shkojë për ndërtimin e stacioneve. Hekurudha Tiranë-Durrës dhe shtesa në Rinas kanë një gjatësi 39 kilometra. Trenat në këtë hekurudhë do të jenë elektrike dhe do të përshkojnë distancën për 22 minuta. Në total do të jenë 11 stacione përgjatë gjithë linjës.
