Ministrja e Arsimit dhe Sportit, Evis Kushi ka njoftuar se mësimi do të vijojë normalisht në disa shkolla të vendit.
Kushi thekson se mësimi nuk do të zhvillohet vetëm në 13 shkolla të njësisë administrative Shkodër. Kjo vjen pasi ky qark ka pasur reshje të dendura të borës.
“Të dashur nxënës, prindër dhe mësues, Strukturat tona arsimore, së bashku me bashkitë, kanë qenë në terren gjatë gjithë fundjavës për të marrë të gjitha masat e nevojshme për një fillim sa më të mbarë të procesit mësimor ditën e hënë. Fatmirësisht, pjesa më e madhe e shkollave ku u ndërpre mësimi javën e kaluar janë kthyer në normalitet, përveç 13 shkollave në disa njësi administrative të Shkodrës (Pult, Shosh dhe Shalë), ku për shkak të situatës së rënduar nga reshjet e dëborës, procesi nuk mund të fillojë ditën e hënë”, njofton Kushi.
