Pak orë përpara mbledhjes së Këshillit të Lartë të Prokurorisë, ku do të zgjidhet drejtuesi i ri i SPAK, faktori ndërkombëtar ka dhënë mesazhet e para.
Në një takim të përbashkët mes Këshillit të Lartë Gjyqësor dhe Këshillit të Lartë të Prokurorisë, ku ishte i pranishëm dhe ambasadori i BE-së në Tiranë, Silvio Gonzato, kërkoi që anëtarët e KLP-së të sigurojnë që Prokuroria e Posaçme të drejtohet nga një person me integritet të padiskutueshëm, i pavarur, profesionist dhe i përkushtuar ndaj standardeve më të mira të BE-së.
“Në prag të zgjedhjes së nesërme të kreut të ri të SPAK, ku Ambasadori Gonzato do të jetë i pranishëm së bashku me ambasadorët e vendeve anëtare të BE-së, ai shprehu besimin se anëtarët e KLP-së do të tregojnë nivelin më të lartë të përgjegjshmërisë dhe do të sigurojnë që Prokuroria e Posaçme të drejtohet nga një person me integritet të padiskutueshëm, i pavarur, profesionist dhe i përkushtuar ndaj standardeve më të mira të BE-së”, u shpreh ambasada e BE-së.
