Prej ditësh, kryeministri Edh Rama dhe gazetari Blendi Fevziu po vijojnë “përplasjen” në distancë me njëri-tjetrin.
Pas një tjetër reagimi të bërë mëngjesin e sotëm nga kreu i qeverisë, nuk ka vonuar shumë dhe ka ardhur dhe kundërpërgjigjja e Fevziut, i cili ka theksuar se ky do të jetë reagimi i tij i fundit sa i përket këtyre replikave të njëpasnjëshme me kryeministrin pas deklaratës që vetë gazetari bëri në studio për ministrat e kabinetit Rama.
Fevziu thekson se debati është fokusuar në një detaj dytësor, ndërsa thelbi i problemit lidhet me mënyrën se si ministrat dhe drejtuesit e lartë të mazhorancës komunikojnë dhe i drejtohen publikut.
Sipas tij, ky model komunikimi nuk gjendet askund tjetër në Europë dhe është një fenomen “Made in Albania”, që përbën turp për standardet demokratike.
“Nese Kryeministri gjen nje rast te dyte ne Europe, qe Ministrat bejne muhabet ne tv me drejtoret, atehere ka te drejte. Por kjo eshte MADE IN ALBANIA! Per turp! Nuk ka asnje pergjigje tjeter derisa Kryeministri te kete kurajo te vije ne studio. Me panelin qe e di vete…”, shkruan Fevziu ndër të tjera.
