Aksioni për çmontimin e kamerave të paligjshme është shtrirë në të gjithë vendin. Pas aksioneve në Shkodër, Vlorë dhe Durrës, policia bën me dije se janë hequr 3 kamera në qarkun e Gjirokastrës dhe Dibrës.
Në kuadër të këtij operacioni mësohet se janë vënë në hetim 2 persona, ndërkohë policia thekson se operacion policor i koduar “Fijet” do të vijojë.
“Vijon plani operacional i koduar “Fijet”, në të gjitha qarqet e vendit. Në fazën e gjashtë dhe të shtatë, operacioni po vijon në qarqet Gjirokastër dhe Dibër, ku janë vënë në hetim 2 shtetas, për ndërhyrje të padrejta në jetën private. Gjatë kontrolleve, Policia çmontoi në Memaliaj, 3 kamera të vendosura në kundërshtim me ligjin, si dhe ka vënë në hetim shtetasin P. K. Ndërkohë, në qytetin e Burrelit, Policia çmontoi 1 kamer të vendosur në kundërshtim me ligjin, si dhe ka vënë në hetim shtetasin G. D“, njofton policia.
