Me tensione të forta po zhvillohet protesta e tetë e opozitës në kryeqytet, ku nuk kanë munguar as përplasjet mes protestuesve dhe forcave të policisë.
Situata është përshkallëzuar ndjeshëm pranë Minsitrisë së Brendshme, teksa nga ana e protestuesve janë hedhur molotovë dhe mjete piroteknike në drejtim të efektivëve, ndërsa policia është kundërpërgjigjur me gaz lotsjellës dhe ujë për shpërndarjen e turmës.
Në kulmin e tensioneve, protestuesit janë dëgjuar duke iu drejtuar forcave të rendit me terma ofendues, ndërsa në disa momente situata ka dalë jashtë kontrollit, duke sjellë edhe përplasje fizike.
Kryetari i Partisë Demokratike, Sali Berisha, është shfaqur me maskë kundërgaz, i cili shoqërohej nga truprojat e tij, eksponentë të lartë të Partisë Demokratike, si dhe mbështetës të shumtë të opozitës.
Pak minuta më herët, militantë të PD-së hodhën molotovë në drejtim të kordonit policor, ndërsa efektivët reaguan me gaz lotsjellës dhe automjete me ujë për të zmbrapsur protestuesit.
Burime nga terreni bëjnë me dije se një prej efektivëve të policisë është ndjerë keq gjatë përplasjes, duke u shkëputur nga kordoni i sigurisë dhe është transportuar drejt spitalit për ndihmë mjekësore.
