Policia e Shtetit ka nisur hetime për një aktivitet të dyshuar të koordinuar në internet që synon dëmtimin e reputacionit të bizneseve turistike në Shqipëri.
Sipas drejtorit të Përgjithshëm të Policisë, Skënder Hita, janë identifikuar mbi 10 mijë llogari, shumica të krijuara së fundmi, të cilat kanë publikuar në mënyrë masive vlerësime negative për hotele, restorante, bujtina dhe biznese të tjera në disa qytete të vendit.
Hita deklaroi se nga verifikimet paraprake rezultojnë indicie për një veprimtari të sinkronizuar, pasi të njëjtat llogari kanë postuar komente negative për biznese të ndryshme brenda një kohe shumë të shkurtër.
Sipas tij, deri tani janë identifikuar rreth 150 profile reale, ndërsa hetimet vijojnë për të zbuluar personat që qëndrojnë pas këtij rrjeti. Ai paralajmëroi se, nëse provohet se aktiviteti ka qenë i organizuar dhe i qëllimshëm, autorët do të përballen me përgjegjësi penale.
Kreu i Policisë e cilësoi këtë si një sulm që prek jo vetëm bizneset, por edhe imazhin e Shqipërisë si destinacion turistik. Ai u bëri thirrje administratorëve të subjekteve turistike të kallëzojnë çdo rast të ngjashëm pranë strukturave të Hetimit të Krimit Kibernetik dhe të ruajnë çdo provë elektronike që mund t’i shërbejë hetimeve.
