Këshillit të Lartë të Prokurorisë i ka mbërritur kandidatura e parë për postin e Prokurorit të Përgjithshëm.
Prokurori i posaçëm i SPAK, Adnan Xholi, ka dorëzuar kërkesën për të marrë pjesë në garën për drejtimin e organit të akuzës.
Xholi është kandidati i parë që aplikon për këtë post, ndërsa procedura për përzgjedhjen e Prokurorit të ri të Përgjithshëm u hap nga KLP përmes një thirrjeje publike.
Mandati 7-vjeçar i Prokurorit të Përgjithshëm aktual, Olsian Çela, përfundon në muajin dhjetor të këtij viti. Afati për dorëzimin e dokumentacionit nga kandidatët është deri më 1 gusht, ora 00:00. Pas mbylljes së aplikimeve, KLP do të vijojë me procesin e verifikimit dhe vlerësimit të kandidatëve në përputhje me procedurat ligjore.
