Gjykata e Lartë e Shqipërisë ka hapur zyrtarisht garën për zgjedhjen e kryetarit të ri, në kushtet kur mandati i Sokol Sadushit përfundon më 17 Tetor, më pas se dy muaj. Mandati është tre vjeçar dhe ai i Sadushit tashmë është gati i përfunduar.
Për të garantuar vijimësinë e punës, kryetari aktual Sokol Sadushi ka shpërndarë njoftimin për të gjithë gjyqtarët e lartë, që të shprehin interes dhe pasuesi i tij të zgjidhet përpara 17 Tetorit.
Kryetari aktual i Gjykatës së Lartë është zgjedhur më datë 17.10.2023 dhe mandati i tij trevjeçar përfundon më datë 17.10.2026, ndaj në respektim të afatit 60-ditor të parashikuar për fillimin e procedurës së re, është bërë shpallja.
“Duke mbajtur në konsideratë periudhën në të cilën fillon kjo procedurë dhe me qëllim garantimin e mundësive reale dhe të barabarta për çdo gjyqtar që plotëson kriteret ligjore për të vlerësuar kandidimin dhe për të shprehur lirisht interesin për ushtrimin e funksionit të Kryetarit të Gjykatës së Lartë;
– Fillimi i procedurës për zgjedhjen e Kryetarit të Gjykatës së Lartë.
– Ftohen të gjithë gjyqtarët e Gjykatës së Lartë që plotësojnë kriteret ligjore për t’u zgjedhur Kryetar i Gjykatës së Lartë dhe që dëshirojnë të kandidojnë, të paraqesin shprehjen e interesit.
Shprehjet e interesit mund të paraqiten nga data e publikimit të këtij njoftimi dhe jo më vonë se data 11.09.2026. Përcaktimi i këtij afati synon të garantojë mundësi reale dhe të barabarta për çdo gjyqtar që plotëson kriteret ligjore për të vlerësuar kandidimin dhe për të ushtruar në mënyrë efektive të drejtën për të shprehur interesin për funksionin e Kryetarit të Gjykatës së Lartë, duke mbajtur në konsideratë periudhën në të cilën fillon kjo procedurë”, thuhet në njoftim.
