Studentët kanë nisur tensionet përpara Ministrisë së Arsimit, duke qëlluar me gurë dyert dhe dritaret e institucionit, ndërsa ndryshe nga dita e djeshme, sot efektivët e Policisë së Shtetit nuk kanë zgjedhur të ndërhyjnë.
Me aq sa kuptohet, nisur nga kritikat e forta dhe përplasjet e dhunshme, sot Policia e Shtetit ka vendosur të zbatojë një strategji tjetër, atë të mbrojtjes dhe jo të sulmit ndaj studentëve.
Efektivët e Forcës së Sigurisë Kombëtare (ish-FNSH), janë brenda rrethimit të Ministrisë së Arsimit por nuk po ndërhyjnë pavarësisht se drejt godinës po hidhen gurë dhe sende të tjera të forta.
Rruga e Durrësit po pret tani mijëra studentë të Tiranës dhe qytetarë pa dallim, të cilët i janë bashkuar protestës dhe kërkojnë dorëheqjen e kryeministrit Edi Rama. Pothuajse të gjitha fakultetet e Tiranës kanë bojkotuar auditoret njëri pas tjetrit dhe të gjithë studentët kanë marshuar drejt Rrugës së Durrësit.
Të parët kanë qenë studentët e Universitetit të Mjekësisë, më pas te Politekniku u njoftua pezullim i leksioneve dhe seminareve dhe njëri pas tjetrit, Shkencat e Natyrës, Inxhinieria, Gjuhët e Huaja dhe Ekonomiku bojkotuan mësimin.
Edhe studentët e Universitetit Bujqësor të Tiranës njoftuan se po ndërprisnin në mes leksionet dhe seminaret dhe po niseshin drejt Ministrisë së Arsimit, aty ku janë grumbulluar mijëra qytetarë e studentë.
