Ministria e Shëndetësisë dhe Mbrojtjes Sociale ka reaguar zyrtarisht për deklaratat në rrjetet sociale, se një student ka humbur jetën në Spitalin e Traumës, pas përplasjeve me efektivët e Policisë së Shtetit.
“Asnjë humbje jete në strukturat spitalore. Përkujdesje shëndetësore maksimale për çdo të lënduar”, thekson Ministria.
Institucioni i drejtuar nga Klodiana Spahiu tregon se deklaratat apo komentet, në dukje në rrjetin social Tik Tok, janë të pavërteta dhe në spitalet e Tiranës po ofrohet shërbim dhe kujdesje maksimale për çdo person të lënduar.
Protesta ka nisur prej orës 11:00 dhe studentëve u janë bashkuar mijëra bashkëmoshatarë nga të gjitha fakultetet dhe universitetet e Tiranës, qoftë publike dhe private, si dhe nxënës të gjimnazeve “Partizani” dhe “Ismail Qemali”.
Policia e Shtetit u ka bërë thirrje të gjithë pjesëmarrësve në tubim të ruajnë qetësinë, të shmangin çdo akt dhune dhe të distancohen nga personat e maskuar që po sulmojnë punonjësit e Policisë dhe po dëmtojnë pronën publike e private.
Në Spitalin Universitar të Traumës (SUT) është paraqitur një protestues, i cili po i nënshtrohet ekzaminimeve mjekësore. Ai raportohet se është Suxhino Zaja dhe paraqitet në gjendje të mirë shëndetësore, është koshient.
