Kryeministri Edi Rama është ndalur edhe te protestat e dhunshme, duke paralajmëruar masa të ashpra ndaj mësuesve që nxisin nxënësit të dëmtojnë institucionet arsimore.
Ai ju referuar një rasti në Lezhë, ku një mësuese dyshohet se ka nxitur nxënësit të thyejnë xhamat e shkollës.
Edi Rama është shprehur se mësuesit që përfshihen në veprime të tilla nuk do të kenë më mundësi të punojnë në institucionet shtetërore.
“Po këto të gjitha nuk hyjnë në lupën e lavatriçeve të parave të zeza në media dhe as në gropat e zeza ku fshihen të ardhurat e shqiptarëve, evazion fiskal me miliona e miliona euro, sepse ato janë aty për ta sjellë ditën e gurit dhe të hurit, me gjithfarë shpifjesh dhe me një tam-tam të përditshëm, të përditshëm e të përditshëm, duke i rrokur kokën të gjithë dynjasë për t’i thënë që çdo pakënaqësi që ju krijohet vjen nga ata atje që po ju vjedhin të gjitha çdo ditë.
Mësues, mësues që marrin nxënësit dhe i nxjerrin nga shkolla dhe u thonë: “Bini xhamave të shkollës”, siç ndodhi në Lezhë. Ajo mësuese dhe ata mësues nuk kanë për ta parë më derën e shkollës dhe nuk do të marrin më asnjë lloj roli si punonjës të shtetit, kurrë më në shtet. Si mundet një mësues t’i thotë nxënësit të thyejë xhamin e shkollës? Çfarë është kjo lëvizje për ta bërë Shqipërinë më të mirë, më europiane, më demokratike, më njerëzore?”, tha Rama.
