Kryeministri Edi Rama ka zgjedhur një tjetër mënyrë për të përcjellë mesazhin e tij për dialog, në një kohë kur protestat e studentëve që kërkojnë largimin e tij vijojnë prej nëntë ditësh.
Kreu i qeverisë ka ndryshuar fotografinë e kopertinës në profilin e tij zyrtar në Facebook, duke vendosur imazhin e njërës prej karrigeve të vendosura prej tij përpara Kryeministrisë, mbi të cilën shkruhet fjala “Dialog”. Kjo lëvizje vjen në një moment tensionesh mes qeverisë dhe protestuesve, të cilët vijojnë të këmbëngulin në kërkesat e tyre.
Pavarësisht protestave, Rama duket se mbetet i vendosur në qëndrimin e tij për të ftuar palët në tryezën e bisedimeve. Përmes këtij gjesti simbolik në rrjetet sociale, kryeministri përsërit mesazhin për dialog, si një rrugë për zbutjen e tensioneve dhe gjetjen e një zgjidhjeje për situatën.
