Kreu i grupit parlamentar të PD, Gazment Bardhi ka reaguar pas ftesës së Presidentit Bajram Begaj për konsultime lidhur me caktimin e datës së zgjedhjeve të ardhshme vendore.
Bardhi e ka cilësuar ftesën si një “teatër politik”, duke pretenduar se data e zgjedhjeve është paracaktuar nga kryeministri Edi Rama. Deputeti demokrat ka hedhur akuza edhe ndaj kreut të shtetit, duke e cilësuar atë si një “ministër pa portofol” në shërbim të Ramës.
Postimi i plotë i Gazment Bardhit:
Sapo jam njohur me shkresën e Institucionit të Presidentit për thirrjen e konsultimeve lidhur me datën që Edi Rama ka paracaktuar për zgjedhjet e ardhshme vendore. E përbuz me neveri këtë teatër politik.
Ftesa e Bajram Begajt është tërësisht e shpërfillshme dhe nuk meriton as koment. Për fat të keq, Shqipëria nuk ka një President të Republikës që përmbush rolin e tij kushtetues, por një ministër pa portofol në shërbim të Edi Ramës.
Shqiptarët janë në shesh për të kërkuar, ndër të tjera, garanci për zgjedhje të lira dhe të ndershme. Nëse Shqipëria do të kishte një President që e ushtron realisht funksionin e tij kushtetues, ai do ta trajtonte këtë çështje si një emergjencë demokratike dhe do t’u përgjigjej me seriozitet shqetësimeve që prej muajsh po i nxjerrin qytetarët në shesh.
Në vend që të heshtë përballë këtyre shqetësimeve, Presidenti duhet të ishte zëri i Kushtetutës, i demokracisë dhe i qytetarëve. Por, në vend që të përmbushë këtë detyrim, ai zgjedh të mbetet në rolin e një spektatori, duke i shërbyer pushtetit në vend që të mbrojë institucionin që përfaqëson.
