Në vorbullën e tensioneve mes punonjësve të tij dhe atyre të Valond Ademit në Aeroportin e Vlorës, biznesmeni Behgjet Pacolli ka ardhur me një tjetër reagim lidhur me situatën, e cila prej ditësh po zhvendoset nga dyert e institucioneve të drejtësisë në rrjetet sociale, e shoqëruar me akuza dhe kundërakuza të njëpasnjëshme.
Përmes një deklarate të gjatë publike, Pacolli ka ngritur shqetësime të forta mbi zhvillimet e fundit që lidhen me projektin e Aeroportit të Vlorës, duke pretenduar se vendime dhe veprime të caktuara institucionale kanë penguar ecurinë normale të investimit.
Sipas tij, nga informacionet e marra pas një takimi në Tiranë mes ekipit ligjor të MABCO-s dhe Avokatit të Përgjithshëm të Shtetit, janë evidentuar dyshime serioze mbi ligjshmërinë e masës së sigurimit të vendosur nga gjyqtarja Miranda Nakaj. Pacolli pretendon se ky vendim ka qenë në kundërshtim me ligjin dhe praktikën e konsoliduar të Gjykatës së Lartë, duke sjellë pasoja të drejtpërdrejta për funksionimin e shoqërisë.
“Sipas informacioneve që na janë përcjellë nga takimi i zhvilluar në Tiranë ndërmjet ekipit të Avokatëve të MABCO-s dhe Avokatit të Përgjithshëm të Shtetit, jemi informuar se janë ngritur shqetësime serioze lidhur me caktimin e masës së sigurimit nga gjyqtarja Nakaj, e cila konsiderohet se është në kundërshtim me ligjin dhe me praktikën e konsoliduar të vendimeve të Gjykatës së Lartë.
Si pasojë e kësaj mase, u pamundësua zhvillimi i Asamblesë së VIA-s, e planifikuar për datën 6 qershor 2026. Pasojat e këtij vendimi vazhdojnë të ndihen edhe sot, duke shkaktuar dëme të konsiderueshme dhe vështirësi serioze në funksionimin e shoqërisë. Gjithashtu, pretendohet se ky vendim ka inkurajuar grupe që veprojnë në kundërshtim me ligjin, të cilat, me çdo mjet, synojnë të pengojnë realizimin e projektit të Aeroportit të Vlorës”, shkruann Pacolli, duke theksuar më tej se ndaj gjyqtares është depozituar kallëzim në SPAK për veprimet që MABCO i konsideron të kundërligjshme. Po ashtu, ai pretendon se ekzistojnë indicie të dokumentuara që përfaqësues të Avokaturës së Shtetit kanë kërkuar bllokimin e mbledhjes së ortakëve të VIA-s, rrethana që sipas tij, do t’i paraqiten gjithashtu SPAK-ut për verifikim.
Pacolli paralajmëron edhe kallëzim penal ndaj punonjësve përgjegjës të Policisë së Vlorës, duke i akuzuar për mosveprim në situatat e krijuara pranë kantierit të aeroportit. Sipas tij, nuk janë marrë masat e nevojshme për zhbllokimin e rrugëve publike dhe garantimin e aksesit normal në zonën e punimeve.
“I bëjmë thirrje organeve kompetente që të mos lejojnë zëvendësimin e shtetit ligjor me vetëgjyqësinë e grupeve apo individëve që veprojnë në kundërshtim me ligjin, por të marrin masa të menjëhershme dhe efektive për rivendosjen e rendit ligjor dhe garantimin e vijimit normal të punimeve”, thekson Pacolli.
