Gjykata e Lartë vendos që kërkesa e Fredi Belerit të shqyrtohet nga GJKKO, duke përcaktuar Gjykatën e Posaçme si kompetente për të shqyrtuar kërkesën për “leje të posaçme” në mënyrë që ai të betohet si kryebashkiak i Himarës.
Vendimi u mor në dhomë këshillimi nga gjyqtarët Sandër Simonaj, Sokol Binaj dhe Ilir Panda. Beleri kërkon leje për t’u betuar si kryetar i zgjedhur i Himarës. Më herët, Gjykata e Posaçme refuzoi kërkesën e tij për leje të posaçme.
Sakaq, seanca e sotme në Gjykatën e Posaçme po mbahet me dyer të mbyllura për shkak se do të pyetet dëshmitari Arsen Rama, i cili bashkëpunoi me prokurorinë dhe zbardhi skemën e blerjes së votave.
Beleri u arrestua 2 ditë para zgjedhjeve të 14 majit pasi akuzohet nga SPAK për blerje votash. Gjithashtu çështja Beleri ka sjellë një përplasje mes Ramës dhe Greqisë zyrtare e cila vazhdon presionet ndaj drejtësisë Shqiptare.
