Ministri i Mjedisit, Sofjan Jaupaj, ishte i ftuar këtë të premte, 29 maj, në studion e Klan News, ku evidentoi disa nga sfidat e institucionit që a drejton.
Ai sqaroi fillimisht se menaxhimi i mbetjeve është sfida më e madhe për ministrinë që drejton.
“Menaxhimi i mbetjeve është sfida më e madhe sa i takon çështjeve mjedisore dhe aspektit të turizmit. Keni absolutisht të drejtë kur thoni që kryeqyteti i vendit, duke qenë dhe pasaporta e parë e prezantimit për shkak të aeroportit, e duhet thënë që Tirana tashmë është dhe kryeqendra e turizmit, ka problematika të menaxhimit të mbetjeve. Në fakt, në shtator, ministria prezantoi reformën e re të menaxhimit të mbetjeve, një reformë që në fakt u vjen në ndihmë bashkive, ku bashkitë do të duhet të fokusohen vetëm në pastrimin e qyteteve dhe gjithë investimi tjetër sa i takon trajtimit të mbetjeve, do të merret përsipër nga qeveria qendrore dhe më saktë Ministria e Mjedisit me Agjencinë e Mbetjeve”, tha ai.
Më tej, Jaupaj u ndal tek gjendja në kryeqytet. Ministri u shpreh se në Bashkinë e Tiranës është e nevojshme të rritet numri i punëtorëve të pastrimit, si dhe po punohet për çmime të favorshme për depozitimin e mbetjeve pranë landfillit të Sharrës. Bazuar në të gjitha këto, Jaupaj tha se brenda këtij viti pritet të përmirësohet menaxhimi i mbetjeve, gjë që do të ndikojë dhe në paraqitjen e Tiranës.
“Me Bashkinë e Tiranës jemi duke punuar në dy fusha. E para ka të bëjë me zgjerimin e hapësirës për pastrimin dhe frekuencën e mbledhjes së mbeturinave nga koshat nëpërmjet kontratës që Bashkia e Tiranës ka me Eco Tirana, sepse duhet thënë që duhen përditësuar këto kontrata duke pasur parasysh që popullata e kryeqytetit rritet, numri i turistëve rritet, dhe patjetër t’i adresojmë këto sfida nëpërmjet kontratave ligjore. Së dyti, i është kërkuar Bashkisë së Tiranës që të zgjerojë edhe numrin e punonjësve të pastrimit. Jam i bindur që janë në drejtimin e duhur për të zgjeruar edhe këtë gamë. Nga ana tjetër, jemi duke punuar edhe me Bashkinë e Tiranës për të pasur çmime preferenciale për depozitimin e mbetjeve pranë landfillit të Sharrës, në mënyrë që gjithë ky menaxhim të kryhet sipas kushteve të duhura dhe të kemi një përmirësim të këtij shërbimi në Tiranë. Faza e punës që ne po bëjmë është që brenda këtij viti kjo performancë të përmirësohet. E kemi detyrim ndaj qytetarëve dhe e kemi detyrim, në fakt, edhe ndaj prezantimit të fytyrës së turizmit shqiptar që është pikërisht kryeqyteti”, tha ai.
