Kreu i LZHK-së, Dashamir Shehi ka akuzuar kryeministrin Edi Rama për lënien në qeli të kryetarit të Bashkisë Tiranë, për të cilin sot Gjykata e Lartë la në fuqi masën e sigurisë “arrest me burg”.
Në lidhje me këtë vendim, Shehi u shpreh se është bërë në mënyrë të qëllimshme, që çështja e Veliajt të zvarritet deri në zgjedhjet zgjedhore. Në intervistën e dhënë për A2CNN, Shehi theksoi është e papranueshme që bashkia më e madhe e vendit të drejtohet nga një kryetar që ndodhet në burg.
“Është turp për gjithë shtetin shqiptar për që një njeri që është në burg dhe drejton bashkinë më të madhe të vendit. Edi Rama do ta zvarrisë këtë punë deri kur të afrohen zgjedhjet lokale. Këtë shenjtallikun politik e di mirë. Ai e tërheq zvarrë se ato që ka vënë të te bashkia kanë qenë njerëzit e vet. Nuk merret vesh kush janë njerëzit e atij dhe këtij. E rëndësishme është që këto s’janë më për qytetin. Ky është një absurd që nuk ka ndodhur në asnjë vend”, theksoi Shehi.
Më tej Shehi nënvizoi se kjo situatë po paralizon administrimin e kryeqytetit dhe po krijon pasiguri brenda vetë Partisë Socialiste për pasuesin e mundshëm të Veliajt. Ndërsa ngriti dyshime për përplasje mes socialistëve.
“Këto për të mbrojtur veten e vet kanë për borxh ti bien institucionit me mos pyet për asnjë gjë. Dhe e kanë treguar gjithë personazhet që janë këtu në Shqipëri. Shumë pak kanë qenë ato që kanë thënë unë po dorëzoj letrat. Këto do ta shtyjnë këtë lloj historie. Duket qartë, erdhi viti i ri mandatohet ai që do hyjë në garë. Është zgjidhur kjo punë. Kush e di si i kanë konflikte atje brenda Partisë Socialiste. Po ta thashë kryeqytetin e Shqipërisë e ka çuar në një situatë grotesku politik administrativ” shtoi më tej kreu i LZHK-së.
Kujtojmë se vetë Edi Rama shpesh ka shprehur shqetësimin e tij se Bashkia Tiranë ka mbetur pa kokë, duke ngritur shqetësimin e tij për mënyrën se si kanë vijuar proceset gjyqësore ndaj Erion Veliajit.
