Dashnor Sula pasi u la jashtë listës së PD-së për zgjedhjet e 11 Majit reagoi ashpër ndaj Flamur Nokes dhe Albana Vokshit.
Sipas Sulës, Noka dhe Vokshi janë dy njerëzit që “gatuajnë një thashethemnajë për Berishën”.
“Nuk mendoj që zoti Berisha nuk i vë vulën i fundit, por tani zoti Berisha ka arritur në një moment se çfarë gatuhet përqark, çfarë gatuhet gjella, se shikoj mënyrën kur shkon në parlament, si rri Albana, si rri Flamuri, si kapin karrigen, si kapin çantën, si i afrohen te veshi. Këta janë dy njerëzit dhe të tjerë aty që gatuajnë një thashethemnajë, ose ngrejnë pluhurin, ose tornadon për zotin Berisha. Kjo nuk është çështje as lëpirje as fresku që i bëjnë zotit Berisha, por gjënë më të madhe e kam nga këta”, tha Sula.
Sula tregoi edhe disa nga prapaskenat në Partinë Demokratike. Ai foli për një grup në aplikacionin WhatsApp ku deputetët deri dje shkruanin më shumë për ditëlindje e festa sesa për punët e partisë.
“Është një grup WhatsApp-i, aty më shumë deri tani më shumë shkruhej për ditëlindje, për festa, sesa për punë partie. Komplimentohenin njëri-tjetrin. Unë zotit Berisha nuk i kam çuar mesazh për ditëlindje. Kështu jam dreqi e mori. Thashë kur nuk i kam çuar këto tre vjet, pse duhet ta bëj tani. Ata në 6 të mëngjesit shkruanin për zotin Berisha. E merr vesh ti. Të luash mendsh pra”, tha Sula.
