Kuvendi i Shqipërisë ka dalë me një draft-deklaratë të përbashkët në lidhje me vendimin e djeshëm të Dhomave të Specializuara në Hagë, ku u dënuan në total me 81 vite burg ish-krerët e UÇK-së.
Deklarata e cila u lexua nga kreu i Kuvendit Niko Peleshi, shprehte mosdakordësinë dhe e konsideron si të padrejtë vendimin ndaj 4 ish-krerëve të UÇK-së. Ndërsa po ashtu nënvizohet se pa sakrificën e Ushtrisë Çlirimtare të Kosovës, historia e çlirimit të Kosovës nuk mund të kuptohet.
“Ishte lufta e një populli për t’i dhënë fund represionit, dhunës dhe përndjekjes dhe për të fituar të drejtën për të jetuar të lirë në vendin e vet. Ajo lindi si përgjigje ndaj represionit sistematik, dhunës, spastrimit etnik dhe genocidit të kryer nga regjimi i Slobodan Milosheviçit”, theksohet në deklaratë.
Sa i përket aktgjykimit, në deklaratë shtohet se vendimi i djeshëm nuk mun dtë rishikojë historinë e një populli. Kuvendi ka shprehur shqetësimin për stadardet e dyfishta që Gjyakata e Hagës ka mbajtur në të shkuarën, përfshirë edhe me kriminelët serb si Ratko Mladiç, cenojnë kujtesën e viktimave.
“Ky aktgjykim nuk është fjala e fundit. Kuvendi pret që të gjitha mjetet juridike dhe shkallët e mëtejshme të procesit të ndiqen deri në fund, duke garantuar respektimin e plotë të standardeve të procesit të rregullt ligjor”, thuhet më tej.
Po ashtu bëhet thirrje që Kuvendi i Shqipërisë, duhet të koordinojë veprimet me Kuvendin e Kosovës për këtë çështje.
