Këngëtarja me famë ndërkombëtare Dua Lipa ka marrë nënshtetësinë shqiptare. Dua Lipa u prit sot në Presidencë nga kreu i shtetit Bajram Begaj, i cili i dorëzoi edhe shtetësinë shqiptare.
Në fjalën e tij, Begaj vlerësoi arritjet e Duas në skenën ndërkombëtare që ka bërë krenare Shqipërinë dhe Kosovën. Pavarësisht suksesit të saj, Begaj tha se Dua është një vajzë e thjeshtë që është shembull për të gjithë të rinjtë shqiptarë.
“Është kënaqësi e veçantë që sot presim artisten e madhe Dua Lipa. Them artiste e madhe, por ajo është edhe një vajzë e thjeshtë, që krenarinë më të madhe na e ka dhënë ne, Shqipërisë, Kosovës dhe kudo ku ka shqiptarë nëpër botë. Rinia shqiptare ju ka shembull dhe ju keni treguar se ëndrrat arrihen duke punuar gjithnjë e më shumë. Ti i ke bërë të gjithë shqiptarët bashkë! Ndaj kam kënaqësinë t’ju jap shtetësinë shqiptare”, u shpreh Presidenti Begaj. Dua Lipa ndodhet në Tiranë me rastin e festave të nëntorit, e cila do të mbajë edhe një koncert FALAS në sheshin ‘Skëndërbej’ me rastin e 110 vjetorit të pavarësisë.
