Deputetja socialiste Iris Luarasi ka paralajmëruar se do të denoncojë aktivistet të cilat i dolën para në ambientet e qendrës tregtare në Tiranë dhe e cilësuan si hajdute, ndërsa me telefona në duar filmuan përplasjen me socialisten.
Përmes një video-mesazhi të shpërndarë pas më shumë se dy orësh nga incidenti i ndodhur sot me protestueset, Luarasi thekson në fjalën e saj se vajzat në fjalë do të përballen me drejtësinë për ofendimet dhe dhunën verbale të ushtruar ndaj saj. Ndërsa shton se nuk lejon asnjë person që të njollosë emrin e saj.
“Sot duke hyrë në Parlament disa vajza më zunë pritë. Me sharje, fyerje, tallje e duke filmuar spektaklin që kishin përgatitur. Dhe patjetër që për një çast u lëndova, jo se nuk e përballoj kritikën por se pashë vajza të reja që besonin se poshtërimi i një gruaje ishte mënyra për të mbrojtur gratë. Më thirrën hajdute, por nderin, punën dhe emrin tim nuk lejoi të m’i vjedhë askush. E aq më pak disa vajza që kanë vendosur që ta quajnë dhunën aktivizëm.
Më akuzuan se nuk mbroj gratë ndërkohë që po dhunonin vetë verbalisht një grua. Kjo është vërtetë ironike por është për të ardhur keq. Mbrojtësve të grave me fyerje në gojë, me telefonin në dorë dhe një grua të vetme që e kishin rrethuar. Unë nuk pretendoj të përfaqësoj këto gra që ngatërrojnë aktivizmin me agresionin, protestën me pritën dhe guximin me fyerjen.
Por përfaqësoj pyetje të tilla gra dhe vajza të tjera që punojnë dhe e ngrenë zërin me dinjitet. Ato që nuk kanë nevojë për një grup, kamera dhe një viktimë për t’ju ndjerë të fuqishme. Kritikën e përballoj, pyetjeve u përgjigjem, por shpifjen dhe kërcënimin dhe dhunën nuk i pranoj. Prandaj këtë rast do ta denoncoj dhe do t’ia lë drejtësisë të veprojë, sepse fyerja nuk është protestë, poshtërimi nuk është aktivizëm dhe më pak dhunë vetëm sepse ushtrohet nga vajzat” thotë Luarasi.
