E cilësuar si zemra e kryeqytetit, zona e ish-bllokut pritet të transformohet.
3 rrugë nga rrugët kryesore të saj do i nënshtrohen rehabilitimit dhe do të kthehen në prioritet për këmbësoret dhe me shpejtësi të kufizuar për automjetet.
“Është vendosur qe në radhë të parë të eliminohen rrugët paralele me Lanën. Vendparkimet për asfaltim për rrugën Pjetër Bogdani, për brigadën 8 dhe më vonë edhe Nikolla Tupe. Qëllimi jonë është që të jetë një këmbësor i sigurt, prandaj ndërhyrja që po propozohet sjell në të njëjtin nivel trotuarin me karexhatën, pra do jenë hapësira të unifikuara, ku këmbësori mund të ecë lirshëm. Ndërsa automjetet do të kenë kufizim të shpejtësisë”, tha nënkryetarja e bashkisë, Frida Pashako.
Vetëm rruga kryesore, ajo “Ismail Qemali” do të ketë një korsi parkimi për automjete dhe po ashtu edhe për biçikletat.
“Rruga Ismail Qemali që është ajo më e madhja dhe më e gjëra do ketë një korsi për parkimin e automjeteve. Wshtë rruga kryesore e bllokut. Na jep mundësi të shtojmë edhe nga një anë një korsi biçikletash për t’u lidhur me gjithë rrjetin në kryeqytet. Do trajtohet me materiale të kuqërremta”, shtoi më tej nënkryetarja e bashkisë.
Kostoja e projektit që pritet të nisë në Maj dhe të përfundoje në Tetor arrin në 300 milionë lekë. Nënkryetarja e bashkisë Frida Pashako thotë se për shkak të fluksit të automjeteve parkimet nëntokësore shihen si zgjidhje për uljen e trafikut.
